ဟားခါးအနီး စစ်ကောင်စီတပ်စခန်း ချင်းပူးပေါင်းတပ်သိမ်းပိုက်
သြဂုတ် ၁၂ ရက်
ချင်းပြည်နယ် ဟားခါးမြို့နယ်ရှိ စစ်ကောင်စီတပ်စခန်းတစ်ခုကို ချင်းပြည်ကောင်စီ ပူးပေါင်းတပ်က ယနေ့(ဩဂုတ် ၁၂) နံနက်တွင် တိုက်ခိုက်သိမ်းပိုက်ခဲ့ရာ လက်နက်ကြီး၊ငယ် မျိုးစုံ ၁၁လက်သိမ်းပိုက်ရရှိခဲ့ကြောင်း ချင်းသတင်းရင်းမြစ်က ပြောသည်။
“အဲဒီလက်နက်တွေက ဒီမနက် ဟားခါးနဲ့သုံးမိုင်အကွာမှာရှိတဲ့ ဟာခါးနဲ့ သီးမစ်ချောင်းကြားမှာရှိတဲ့ ကေးဘန်းဇွမ်စခန်းက သိမ်းဆည်းရရှိခဲ့တဲ့ဟာတွေဖြစ်တယ်”ဟု သတင်းရင်းမြစ်က ပြောသည်။
သတင်းရင်းမြစ်ပြသသည့် ဓာတ်ပုံတွင် လက်နက်ကြီး တစ်လက်နှင့် စက်သေနတ် တစ်လက်နှင့် လက်နက်ငယ် ၉လက်၊ ၄၀ မမ ဗုံးသီးနှင့် အခြား ခဲယမ်းကျည်များစွာကို ချင်းပူးပေါင်းတပ်က သိမ်းပိုက်ရရှိထားသည်ကို တွေ့ရသည်။
ချင်းအမျိုးသားတပ်မတော်(CNA)နှင့် ချင်းဒေသကာကွယ်ရေးတပ်(CDF)တပ်များ ပူးပေါင်းပါဝင်သည့်ချင်းပြည်ကောင်စီ တပ်ပေါင်းစုသည် ဩဂုတ် ၁၂ရက် နံနက် ၉နာရီခန့်တွင် ကေးဘန်းဇွမ်စခန်းကို သိမ်းနိုင်ခဲ့ခြင်းဖြစ်သည်ဟု ဆိုသည်။
တိုက်ပွဲအတွင်း ထိခိုက်ကျဆုံး အခြေအနေနှင့် စစ်သုံ့ပမ်းများ ဖမ်းဆီးရရှိမှု ရှိမရှိ အခြေအနေကို မေးမြန်းရန် CNA ပြောရေးဆိုခွင့်ရှိသူ ဆလိုင်းထက်နီထံ ဆက်သွယ် နေဆဲဖြစ်သည်။
ချင်းပြည်ကောင်စီ ပူးပေါင်းတပ်နှင့် စစ်ကောင်စီတပ်တို့သည် ယနေ့တွင် ထန်တလန် မြို့တွင်းလည်း တိုက်ပွဲပြင်းထန်နေသည်ဟု သတင်းရင်းမြစ်က ပြောသည်။
ဟားခါး – ထန်တလန်ကြားရှိ စစ်ကောင်စီတပ်စခန်းများကို ချင်းပြည်ကောင်စီ ပူးပေါင်းတပ်က ဇူလိုင် ၂၂ရက်မှ စတင်တိုက်ခိုက်ခဲ့ပြီး ထန်တလန်မြို့သိမ်းစစ်ဆင်ရေးကို ဩဂုတ်လဆန်းကဆင်နွှဲခဲ့ရာ ထန်တလန်၌ နောက်ဆုံးကျန်နေသည့်ခလရ(၂၆၉)တပ်ကုန်းကို သိမ်းပိုက်ရရှိထားပြီးဖြစ်သည်။
အဆိုပါ တပ်ကုန်းမှ စစ်ကောင်စီတပ်များ မြို့တွင်း ထွက်ပြေးသွား၍ ဆက်လက်တိုက်ခိုက်နေဆဲဖြစ်သည်။
ဇူလိုင် ၂၂ရက်မှစတင်ခဲ့သည့် ချင်းပြည်ကောင်စီ ပူးပေါင်းတပ်၏ စစ်ဆင်ရေးအတွင် စစ်ကောင်စီတပ်စခန်း ၈ခုထက်မနည်းကို သိမ်းပိုက်ရရှိထားသည်။
(ဟားခါးမြို့နယ်ရှိ စစ်ကောင်စီတပ်စခန်းတစ်ခုကို ချင်းပြည်ကောင်စီ ပူးပေါင်းတပ်သိမ်းပိုက်ပြီးနောက် ရရှိသော လက်နက်ခဲယမ်းများ။ ဓာတ်ပုံ – ပေးပို့)
crd
